Sailing Life...

Tuipuia vak chhuak thin lawng khalhtute dinhmun hi itawm ka ti thin. Hringnun  nena khaikhin chang awm mah se, hringnunah chuan khawiah nge kan tawp dawn kan hre lawk si lo va. Lawng mite chuan an tum ram thleng turin theihtawp an chhuah a, nang leh kei hian tum ram kan nei ve em? 

Thil reng reng nih phung dik tak hi khawi laiah hian nge a awm? ‘Beng’ hi ri kan hriat theihna hmanrua a nih avanga ‘beng’ tia ko nge kan nih ‘beng’ a nih vangin ri kan hre thei zawk? Diklohna hi awm ta lo se, dikna kan tih hian awmzia a nei lo vang a, rinawmlohna hi awm ta lo se, rinawmna hian hlutna a nei hek lo vang.

Zana thla eng ut mai mawina tifiahtu chu a chheh vel thim chhah tak a nih chhung chuan thil eng pawh mai hian pang hnih an nei reng dawn a, chung pang hnihah te pawh chuan a rual rem lai leh rem lo lai a awm reng ang. Chu chu khawvel piantirh ata Siamtu min siam dan leh kan nihna tura nihphung min pek chu a nih avangin thil reng reng nihphung diktak inthup hi hai chhuak a, hre fiah tur chuan engkim hi a nihna ang anga pawm thiam a \ul si a ni.

Darthlanga kan hmel lo lang \hin hi em ni ka hmel dik tak tia ka koh \hin chu? Nge ka thlalaka ka mit, ka beng leh sam lo lang zawk hi? Chungte chu ka lan dan mai an ni a, ka ‘hmel’ an nih chuan ka hmel chuan mi engzat nge a bum a, mi dang hmel chuan vawi engzat nge min bum tawh le. Hmel mawina hi bumtu bumna bumro, buan chak lo te chaklohna cho chhuak a, buan chakte chakna leh chhelna chhem kiangtu a ni. Mahse, chu hmel mawina pawh chu amah mai chuan bumtu a tling lo va, chu hmel mawina phena thuhruka awm, thuruk ril ber ni tura engtik lai pawha biru reng \hin zawk chuan a hmel chu tar langin, a nihna chu thup lo va pho chhuah ni ta se, tu mahin chu hmel chu kan hmu chak kher lo vang.