Short Story:I HUN MIN LEITIR RAWH (Father's day pual)

He thawnthu tawite, Pafa inbiakna  hi a ziaktu ka hre mai lo va, English atanga ka lehlin a ni a. Ka rilru a khawih khawp mai:


Pa pakhat hi a hna atangin a rawn bang a, a fapa chu khawhar deuh hian amah chauhvin inah a lo awm a. A fapa chuan a pa lo haw mek chu a lo thlir reng a. Hetiang hian an inbia a:


Fapa: Ka pa, zawhna pakhat ka zawt thei che ang em?
Pa: Teh lul e, eng nge ni ta ka fapa?
Fapa: Ka pa, darkar khatah hian eng zat nge i hlawh thin?
Pa: Chutiang thil ngaihtuah suh, i hriat ve a tul lo ve. Engtizia nge?
Fapa: Ka hre duh a ni. Darkar khatah eng zat nge i hlawh? Khawngaih takin min hrilh rawh.
Pa: Chutia i hriat duh tlat chuan le, chawh rualin darkar khatah hian Rs.100/- vel ka hlawh ang.
Fapa: Khai aw...(Lungngai takin a lu a dawm a, a kun deuh ngaih a)
Fapa: Ka pa, khawngaih takin Rs.50/- min puktir thei ang em?
Pa: (Thinrim takin a fapa chu a melh a) Mai mai a, puk i duh vang lek a ni maw ka hlawh zat min zawh. A theih loh.


Lunghnur takin a fapa chuan pindan a pansan ta a. A pa chuan a mut hmunah a fapa nena an inbiakna chu a ngaihtuah zui a, a fapa a chhan dan chuan a rilru a tihrehawm hle a. Harsatna eng emaw tak a tawk a nih ringin a fapa pindan lam chu a pan a.
Pa: Ka fapa, i muhil tawh em?
Fapa: Ka la muhil lo.
Pa: Nichina ka chhan dan che kha i tan a nat ka hlau deuh hlek a, thil awmzia chu...nilengin hah takin hna ka thawk a, ka lo chau deuh em a ni. Kha, Rs.50/- chu hmang rawh.
A fapa chuan a pa pawisa pek chu hlim deuhin a la a, chutah, a lukham hnuai atangin pawisa nawi tam tham tak a rawn phawrh a, a chhiar nghal a. A pa chuan a fapain pawisa a lo khawl teuh tih a hmuh chuan a thinrim thar leh ta a. 
Pa: Khatianga pawisa i neih reng si chuan engatinge pawisa puk min la dil cheu?
Fapa: Ka pa, puk ka dilna chhan chu ka pawisa mamawh ang ka khawl loh vang a ni, i Rs.50/- nen hi chuan ka mamawh ang ka nei ta. Pa, darkar khatah Rs.100/- i hlawh chuan he pawisa, ka lo khawl sa leh min puktir hi Rs.100/- chiah a ni a, hei hian i hun darkar khat ka lo lei ange. Ka ngai lutuk che a, i bula darkar khat chauh hun hman hi ka thlahlel a ni. Ka tan darkar khat hun min pe thei ang em?


A pa chuan a fapa chu a kuah a, a fapa tana hun a neih lohzia a inhrechhuak a, a fapa hnenah chuan ngaihdam a dil ta zawk a ni.


Hringnunah hian kan neih loh neih tumin kan thawkrim theuh mai a, min ngaina em emtute bulah pawh hun hmang thei lovin kan buai thin a ni lo'm ni?





Ka pa,
Pangpar min leisak kha 
A mawi ka ti..
I kawr min leisak pawh kha
A mawi ka ti.
Mahse, ka nui dawn lo, 
A chhan chu ka lung a awi lo
Ka bula i awm ngai loh avangin...........Fr....i fanu