POEM: ZIR KHUA A SEI (Free verse)

Piantirh ata zir a bang thei lo

Tah lai khua a sei hluan e.

Ninawm….aw…ninawm ber mai

Chun leh zuate u

Ban zai ka rel thei lawm ni?

             “Ban zai i rel mai chuan e

              Engtin nge hraileng i chawi ang?

              Sum fang tel lo damlai nunpui chu

              Tah lai khua a sei ting mai dawn asin”
Phek tin ka phet chang hian e

Chhingmitah khuangruah chiar nghian e
Phek tinah ruah mal a far zel si!

Zir lova sahmim ip puar dan hi

Chun leh zuate u, in hre lo’m ni?
              “Thawk lo chuan ei pawh ei suh se

               Zir lo chu an lungmawl thlawn,

               Sahmim ip puar nan mai lo hian

               Zir nang che lungmawl hnawt tiauva'n”                                   

‘Lungmawl’ tiin min sel mah la
Zir ninawm ai chuan pawi teh suh e

Zir ai chuan lungmawl nih pawh

Thlang zel mai nange, val lungmawla’n.                                          

                “Zir peih lo hringmi zet chu e

                  I thinlaiah tiau chum a zing phui ngei

             Hrilh fin har hringmi lungmawla’n

                 I dawn phak nem lungchhir i nul tur hi”
A pawi lem em ni le…

Ka chun leh zua dam lai hrui ang a sei chuan

Lungchhir ka nul a nih pawn e

Hru hul nang che, tah lai mittui.

                “Dam lai hrui ang sei mah se,

                 Khua ruatin lai tha a kiam ang a,

                 I tah lai mittui hru hul tur hian
                Lai tha a zam reng dawn si lo”
Thatchhe pa, phun phun lo khan

Tha te te khan zir mai teh.